الخرطوم=^المندرة نيوز^
* اليوم الوهج بلهجة محمد كوبر احد صناع المحتوي …محمد عوض (شفت بحري) ود كوبر ..محمد ده للذين لا يعرفونه زول جميل المفردة والمحتوي…بظهر طوالي لايف بمحتويات ذات موضوع من الزمن الجميل وكل ازماننا جميلة بس وقت التقييم لجمالها لم يحن بعد…اصلو الانسان بحب زمان وكلما تقدم في السن عشق دنيته ودنياه القديمة اكثر..اها محمد كوبر ده بحكي لي ناس زمانحاجاتهم وبربط جيل اليوم بالامس مع انو هو حضر الزمان داك في سن السابعة والعاشرة ودائما يقول ليك من الزمن داك راسخة في ذهني….ايوه صح بترسخ زمان وبتطلع ابداع الان لي ناس زمان…انتو فاهمين حاجة ؟؟….كده خلوني افهمكم وانا ذاتي افهم معاكم.

* يعني التلاجة جات بديل للازيار والمشلعيب…لحفظ الطعام وتبريد الماء…اها ناس زمان اتعودوا علي موية الزير واكل المشلعيب…عارف في ناس متقلقلين عاوزين يعرفوا مشلعيب يعني شنو….قسما تعالي ما اوريكم …اشمعنا نحن نعرف حاجات زمنكم ونجتهد وانتو لا بتعرفوها لا بتجتهدوا حتي تعرفوها.

* زمان المواصلات دواب حصين وحمير وبغال …مافي عربات زي الان وطائرات وغيره بلاوي متلتلة …شوف نحن بنسميها بلاوي متلتلة عشان ما قادرين نتعامل معاها دي ليها ناسه ونحن بقينا تعاسة …اها نحن بنعرف السرج والسدار واللجام والبردعة والخرتاية والخرج وبنعرف الضناب …ده كله مافي الان نحن كنا بنعرف نشد الحمار والحصان يعني نلبسها الاجهزة كلها بلغة اليوم …ومن هنا جاء الحنين للزمان وكل حكاوينا يا حليل زمان…فقط لاننا ما قادرين نتأقلم مع حاجات الليلة ….الانسان صنع الطيارة فاحترق بيها في الجو واخترع الصاروخ فدمر بيه غيره ونفسه…واخترع الكهرباء فاحترق ومات…هكذا قال ابن خلدون كلما تطور الانسان كلما كتب نهايته.

* ما علينا.. طلعنا خالص من موضوع وهج اليوم….نعود ونقول…..اجمل خبر سمعته وقرأته ان (سودانير) الخطوط الجوية السودانية الناقل الوطني .. تسارع الخطى لشراء (11) طائرة …ايوه والله لو صدق الحديث يبقي كلام الوداعية صح …يمر السودان بسنوات عجاف….قاسيات ثم يعود فيصحح المسار فينتعش….معقولة يا اخوانا ممكن ننتعش تاني بعد ده كلو بس شرط ما زي زمان انتعاش جديد زي الناس (البرة)…عالم جديد مسكون بحنية وود ودفء اهل السودان الزمان يا حليل زمان…..ويا شريري علي ناس زمان.

* نتطور لكن نشيل معانا محبتنا وريدتنا وحنيتنا وكل شئ حقنا من زمان …بس نخلي عوارتنا وهبالتنا وهاشميتنا وانانيتنا وسذاجتنا وعبطنا الزمان نشيل مفاهيم لمتنا وسلامنا وشطتنا ودكوتنا وبصلتنا وكسرتنا لكن نتطور في سلاحنا وطائراتنا وعرباتنا ..لكن نشيل معانا للزمن الجديد مركوب جلدنا وجلاليبنا وعممنا وطواقينا وعكاكيزنا المضببة الما بتكتل لكن بتأمن نشيل معانا بقرنا وحليبنا وابلنا .

* ماعاوزين بيوت الجالوص مطرنا غزير واهمالنا كتير وشفشافينا كتار قبل يجي الفريق عابدين …عاوزين شوارع الظلط والاسفلت عاوزين موية ماسورتنا الكنا بنشربه بيدينا مباشرة طعمها حلو بلا طعم ولونها شفاف بلا لون ورائحتها ذكية بلا رائحة وصحتها مية مية…موية النيل المليانة طمي قبل تتجير وتتنيل وتتطين وتتسجم وتترمد وتبقي دايره غسيل بموية غازية .

* سودانير لو جابت حداشر طائرة علي الموجودة (عوينة ام صالح).. يكون الله ادانا والله شافنا والله عتقنا ونجدنا ورجع سيادتنا وعزنا وقسما تعالي عندنا عقول تدور العالم مش سودانير….ناس سودانير عقول وبيوت خبرة مزهلة …اولاد عز واولاد اسر واولاد سودان جد جد….سودانير ناقلنا الوطني ..لو عزمنا وشدينا حيلنا كفاية ببقن الف طائرة.

* لو عادت سودانير سيعود السودان اقوي.. ومالو تاركو تبقي وبدر تبقي وزيادة الخير خيرين …وتاني نسوي طيران عزة وطيران كتم وجبل عامر
وكادقلي والفولة….وطيران كسلا وترانزيت والمناقل….ومدني الجميلة ….وكل المناطق دي فيها رأس مالية بالكوم يشتروا دول وليس طائرات…سفريات داخلية
وتشتعل المنافسة ….المشكلة وين؟

سطر فوق العادة :
البلد الوحيدة في العالم الماضيها افضل من حاضرها ومستقبلها المجهول….قبلنا بالتطوير لكن نشيل حاجتنا السمحة من زمانا الجميل لمستقبلنا الواعد وبكرهق احلي وسودانير (ول تيك اوف) قولوا يارب امييييين.

(ان قدر لنا نعود)